សូម

សូម

សូមខ្មែរកុំភ្លេចអក្សរខ្មែរ
សូមខ្មែរជួយថែវប្បធម៍ខ្លួន
សូមខ្មែរកុំប្រែដើរខុសក្បួន
សូមខ្មែរថែថួនជាតិទឹកដី ។

សូមខ្មែរកុំអរនឹងបរទេស
សូមខ្មែរកុំធ្វេសភ្លេចស្មារតី
សូមខ្មែរគិតវែងកុំគិតខ្លី
សូមខ្មែរប្រុសស្រីមើលឲ្យឆ្ងាយ ។

សូមខ្មែរបោះដៃជួយជាតិខ្លួន
សូមខ្មែរកុំពួនសុខសប្បាយ
សូមខ្មែរសម្លឹងជុំវិញកាយ
សូមខ្មែរកុំក្លាយភ្លេចខ្លួនខ្មែរ ។

សូមខ្មែរកុំបិទភ្នែកត្រចៀក
សូមខ្មែរកុំងាកគេចបង្វែរ
សូមខ្មែរអាសូរចិត្តអ្នកស្រែ
សូមខ្មែររួមថែអង្គរជាតិ ។

សូមខ្មែរកុំភ្លេចមើលប្រវត្តិ
សូមខ្មែរកុំភ្លាត់ដើរខុសទៀត
សូមខ្មែរគួរភ្លើនភ្លាំងភ្លេចញាតិ
សូមខ្មែរគួរឆ្លៀតគិតជាតិផង ។

សូមខ្មែរគិតខ្មែរជំនាន់ក្រោយ
សូមខ្មែរកុំឲ្យខ្មែរសៅហ្មង
សូមខ្មែរទុកផ្លូវខ្មែរដើរផង
សូមខ្មែរកុំចងជាតិខ្មែរឯង ៕

និពន្ធដោយ ប៊ុន ពិសី (31.10.2013)