ទិវាបុណ្យឆ្លងឆ្នាំសាកល ២០១៣ ឆ្លងចូលឆ្នាំ ២០១៤នេះ ខ្ញុំសូមផ្ញើជូនកំណាព្យថ្មីមួយបទ ដែលមានចំណងជើងថា “ បណ្តាំមាតុភូមិ ” បទត្រឡាចឡើងទ្រើង ( ពាក្យ៧ ) (ឬ បទវល្លិព័ទ្ធរាន)

ទិវាបុណ្យឆ្លងឆ្នាំសាកល ២០១៣ ឆ្លងចូលឆ្នាំ ២០១៤នេះ
ខ្ញុំសូមផ្ញើជូនកំណាព្យថ្មីមួយបទ ដែលមានចំណងជើងថា
“ បណ្តាំមាតុភូមិ ”
បទត្រឡាចឡើងទ្រើង ( ពាក្យ៧ )
(ឬ បទវល្លិព័ទ្ធរាន)

- ម៉ែផ្តាំចាំជាក់អ្នកជឿម៉ែ
ស្តាយខ្មែរស្រែក្រុងក្នុងក្រៅស្តាយ
កាយមួយព្រួយទៀតជាតិគ្រប់កាយ
ខ្លះទៅនៅឆ្ងាយស្តាយកូនខ្លះ។

-បងប្អូនកូនចៅផៅប្អូនបង
ចាស់ផងឆ្លងគ្រោះព្រោះរឿងចាស់
ខ្មាសគេរេគិតពិតធ្លាប់ខ្មាស
ជាន់ស្មានដានចាស់ខ្មាសឈប់ជាន់។

-កុំហែកបែកបាក់ចាក់ដោតកុំ
មាន់សុំកុំធៀបលាបធ្យូងមាន់
ភាន់ភ្នែកវែកវល់ជល់ព្រោះភាន់
បងស្តាប់ស័ព្ទទាន់មាន់ប្អូនបង។

-បែរស្ងាត់បាត់ញាតិឃ្លាតព្រោះបែរ
ដងផ្លែបែរក្រោយឱ្យខាងដង
ម្តងម្តេចល្បិចខ្លាំងខ្មាំងអរម្តង
ម៉ែផ្តាំចាំចងផងពាក្យម៉ែ៕៚
ថ្ងៃទី៣១ ខែធ្នូ ឆ្នាំ២០១៣
ដោយ វ៉ែន សុន
ទីប្រឹក្សាគណៈកម្មការកណ្តាលនៃសមាគមអ្នកនិពន្ធខ្មែរ
និងជាសាស្ត្រាចារ្យផ្នែកកំណាព្យ នៅមហាវិទ្យាល័យសិល្បៈនាដសាស្ត្រ
នៃសាកលវិទ្យាល័យភូមិន្ទវិចិត្រសិល្បៈ។