មើលចន្ទនឹកស្រុក

មើលចន្ទនឹកស្រុក

១*ជំនោរកក្ដិករឭកស្រុកស្រែ

នឹកពុកនឹកម៉ែឯកម្ពុជាក្រោម

រាត្រីខែភ្លឺខ្ញុំឮសត្វយំ

ធ្វើអោយអារម្មណ៍ក្រៀមក្រំរិតទ្វេ។

២*អង្គុយភ្លូកភ្លឹកនឹកគ្រាកន្លង

ជួបជុំប្អូនបងក្រោមម្លប់ពុកម៉ែ

នឹកគ្រូនឹកមិត្តនឹកញាត្តិហូរហែ

នឹកមាតុភូមិកេរ្ដ៍ដីខ្មែរថ្លៃថ្លា។

៣*នឹកវត្តអារាមធ្លាប់រៀនយប់ថ្ងៃ

រៀនខ្មែរបាលីអក្សរសាសនា

នឹកបុណ្យកឋិនបុណ្យសែនដូនតា

សប្បាយអស្ចារ្យថ្ងៃបុណ្យចូលឆ្នាំ។

៤*សំពះព្រះខែបុណ្យអកអំបុក

មានប្រណាំងទូកងជាប្រចាំ

មានលយប្រទីបនិងបង្ហោះគោម

មានល្ខោនមានរាំល្បាំប្រពៃណី។

៥*នឹកបុណ្យភ្នំពាន់បញ្ចុះសីមា

បុណ្យឆ្លងសាលាបុណ្យផ្កាសាមគ្គី

បុណ្យកំសាន្ដស្រុកបុណ្យនឹកស្នាដៃ

ធ្លាប់រួមសប្បាយប្រែក្លាយជាព្រាត់។

៦*នឹកគ្រារាំវង់នៅក្នុងរោងការ

នឹកធ្លាប់ទស្សនារឿងល្ខោនកំសត់

នឹកគ្រាកន្លងធ្លាប់ជាក្មេងវត្ត

រស់ដោយបាយបាទ្ររៀនអក្សរខ្មែរ។

៧*នឹកល្ខោនបាសាក់រស្មីប្រទីប

ឆ្លងព្រែកទឹកប្រៀបកាត់វាលស្រូវស្រែ

ឮស្គរឆ្លើយឆ្លងចង់ភ្លេចសុំម៉ែ

ខ្ញុំនឹកម្លេះទេនឹកគ្រាអតីត។

៨*ឱកម្ពុជាក្រោមមាតុភូមិខ្ញុំអើយ

ខ្ញុំព្រាត់យូរហើយព្រាត់ព្រោះជីវិត

តើថ្ងៃណាទៅទើបបានជួបជិត

រួមរក្សស្នេហ៍ស្និតដូចគ្រាកន្លង៕

រាត្រីនឹកស្រុក នាកំពូលភ្នំពេជ្រគិរី ឆ្នាំ ២០០៣ 

 និពន្ធដោយ ថាច់ តៀង