ជីវប្បវត្តិព្រះភិក្ខុធម្មបាលខៀវ ជុំ

ជីវប្បវត្តិព្រះភិក្ខុធម្មបាលខៀវ ជុំ

ព្រះភិក្ខុខៀវ ជុំកើតនៅព.ស២៤៥០ គ.ស១៩០៧ នៅភូមិអន្លង់តាសេក សង្កាត់ព្រែកអំបិល ស្រុកស្អាង ខែត្រកណ្ដាល។ ឪពុកនាមង៉ែត ខៀវ ម្ដាយនាមកែវ ចិនមានមុខរបរពាណិជ្ជកម្ម បសុកម្ម នេសាទកម្ម និង កសិកម្ម។ អាយុ១២ឆ្នាំ កុមារខៀវ ជុំត្រូវម្ដាយឪពុកនាំទៅវត្តរៀនលេខ អក្សរក្នុងសំណាក់លោកគ្រូទន់ ជាន់ចៅអធិការវត្តសេដ្ឋីសង្កាត់បានកាម ស្រុកព្រែកកប្បាស ខែត្រតាកែវ។ អាយុ១៧ឆ្នាំ បានបួសជាសាមណេរក្នុងសំណាក់លោកគ្រូទន់ ជាន់ជាឧបជ្ឈាយ៍នៅព.ស២៤៦៧ គ.ស១៩២៤។ ពេលព្រះឧបជ្ឈាយ៍សុគត សាមណេរចេញទៅនៅវត្តលង្កាដើម្បីសិក្សាវិជ្ជាព្រះពុទ្ធសាសនា នៅព.ស២៤៦៩ គ.ស១៩២៦ ដោយត្រូវរកគ្រូ និង កន្លែងអាស្រ័យនៅយ៉ាងលំបាក។ លុះដល់ព្រះជន្ម២១វស្សាបានឧបសម្បទាជាភិក្ខុក្នុងពុទ្ធសីមាវត្តលង្កាអំពីគណៈសង្ឃ២០អង្គមានសម្ដេចព្រះធម្មលិខិតល្វី ឯម ឧត្ដមក្រុមប្រឹក្សាគណៈមហានិកាយជាឧបជ្ឈាយ៍ ព្រះតេជគុណឥន្ទលិខិត យី ជាឧបសម្បទាចារ្យ។ ភិក្ខុខៀវ ជុំមាននាមប្បញ្ញត្តិថា"ធម្មបាល"នៅព.ស២៤៧១ គ.ស១៩២៨។ ភិក្ខុខៀវ ជុំនៅបម្រើព្រះឧបជ្ឈាយ៍អស់៦វស្សាក្នុងវត្តលង្កា។ ព្រះអង្គមិនមានវិញ្ញាបនបត្រ សញ្ញាបត្រ និង ប្រកាសនីយបត្រពីក្រសួងឬពីសំណាក់ការសិក្សាណាមួយឡើយ។ ក្នុងវត្តលង្កា ធម្មបាលបានរៀនចប់ធម្មវិន័យថ្នាក់ត្រី ទោ ឯកប្រលងជាប់លេខ៧។ ពុទ្ធិកបឋមសិក្សារៀនចប់គ្រប់ថ្នាក់មិនមានចាត់ការប្រលងទេ។ពុទ្ធិកមធ្យមសិក្សារៀនបាន៣ឆ្នាំត្រូវឈប់ដោយសុខភាពមិនល្អ។ ព.ស២៤៧៧ គ.ស១៩៣៧បង្រៀននៅវត្តគោកទ្រា ខែត្រកំពង់ចាម៣ឆ្នាំ។ ព.ស២៤៨៣ គ.ស១៩៤០បង្រៀនវត្តដីឥដ្ឋ ឃុំដីឥដ្ឋ ស្រុកកៀនស្វាយ ខែត្រកណ្ដាល៤ឆ្នាំ។ ព.ស២៤៨៧ គ.ស១៩៤៤បង្រៀនភាសាខ្មែរ ភាសាបរទេសខ្លះនៅវត្តលង្កាភ្នំពេញ១ឆ្នាំ។ ព្រះភិក្ខុអង្គនេះក៏បានបន្សល់ទុកនូវស្នាដៃតែងនិពន្ធដូចជា៖១-ល័ក្ខវិជ្ជាការរដ្ឋភាគ១-២,២-គូមិត្តឥទ្ធិបាទ,៣-បញ្ហាជីវិត,៤-សំវេគធម៌,៥-ត្រៃលក្ខណ៍,៦-កម្ពុជវេយ្យាករណ៍,៧-បញ្ហាអនាគត,៨-បញ្ហានរកសួគ៌,៩-សីលធម៌សាកល,១០-ជីវិតគ្រប់លក្ខណ៍,១១-ពិភពលោកភាសិត,១២-ទានទស្សនៈ,១៣-និព្វានទស្សនៈ,១៤-វេយ្យាករណ៍យើង,១៥-ត្រៃចរិយា,១៦-ជីវិតទស្សនៈ,១៧-វិញ្ញាណទស្សនៈ,១៨-ពុទ្ធវិទ្យារឿងបុណ្យបាប,១៩-សាកលចិន្ដា,២០-ទស្សនៈសាកល,២១-ប្រជាធិបតេយ្យចាស់ទុំ,២២-និព្វាននៅឯណា?,២៣-ឧត្ដមគតិជីវិត,២៤-ជីវិតតស៊ូ,២៥-ព្រះធម្មទេសនាព្រះធម្មបាលខៀវជុំ,២៦-សន្តិភាពតាមគតិពុទ្ធសាសនា,២៧-ជីវិតសន្តិភាព,២៨-ជីវិតកសាងខ្លួនឯង និងចិត្តវិទ្យានៃសង្គម,២៩-ជីវិតឈ្នះលោក,៣០-សាធារណរដ្ឋ៘
ភិក្ខុធម្មបាលខៀវ ជុំជាឥស្សរជនសំខាន់នៅក្នុងរបបសាធារណរដ្ឋខ្មែររបស់លោកសេនាប្រមុខលន់ នល់។ នៅពេលពួកខ្មែរក្រហមចូលកាន់កាប់រាជធានីភ្នំពេញ ព្រះអង្គត្រូវពួកទមិឡឥតសាសនាធ្វើគុតនៅខែត្រកំពង់ឆ្នាំងប៉ុន្មានសប្ដាហ៍ប៉ុណ្ណោះក្រោយជ័យជម្នះ។