០៤ មិថុនា ១៩៤៩ មហាទុក្ខនៃប្រជាជាតិខ្មែរ ដោយ ផេង វិសុដ្ឋារ៉ាមុនី

០៤ មិថុនា ១៩៤៩ មហាទុក្ខនៃប្រជាជាតិខ្មែរ
ដោយ ផេង វិសុដ្ឋារ៉ាមុនី
********************************************
១. បួនមិថុនាសែប្រាំបួន
ប្រជាជនយួនមានសង្ឃឹម
មុខយួនស្រស់ថ្លារីកញញឹម
ខ្មែរអស់សង្ឃឹមព្រោះបាត់ដី ។
២. ប្រជាជនខ្មែរពេញនគរ
រំជួលវឹកវរភ្ជាក់ស្មារតី
អយុត្តិធម៌បារាំងកាត់ដី
ខ្មែរក្រោមប្រុសស្រីឃ្លាតពីអង្គរ ។
៣. បួនមិថុនាបារាំងចារ
ថ្ងៃប្រថាប់ត្រាច្បាស់ជំហរ
ដោយលោកវ៉ាង់សង់អ៉ូរីយ៉ូល
យួនស្រែកជយោ!ច្បាប់បារាំង ។
៤. បួនមិថុនាបារាំងចារ
ប្រកាសផ្លូវការមោហ៍បិទបាំង
ប្រគល់ដែនទឹកដីកូសាំង-
ស៊ីនសែសបារាំងឲ្យបាវដាយ ។
៥. បួនមិថុនាសែប្រាំបួន
ខ្មែរឈឺចាប់ផ្ទួនគ្រប់រូបកាយ
ឲ្យតែកូនខ្មែរទោះជិតឆ្ងាយ
ស្មារតីខ្វល់ខ្វាយស្រណោះខ្លាំង ។
៦. បួនមិថុនាសែប្រាំបួន
ខេមរាចាញ់យួនព្រោះបារាំង
ទុក្ខត្រួតទ្វេទុក្ខខ្សោះកម្លាំង
កូនខ្មែរសំកាំងស្តីមិនចេញ ។
៧. បួនមិថុនាបារាំងចារ
ក្បត់កិច្ចសន្យាហ្លួងនរោត្តម
ធ្វើច្បាប់ចេញច្បាប់ដោយបន្លំ
ព្រមទាំងបង្ខំខ្មែរឲ្យយក។
៨. បួនមិថុនាបារាំងចារ
សន្ធិសញ្ញាក្បត់សាលក្រម
ម្ភៃមួយខេត្តទឹកភ្នែកក្រហម
ខ្មែរអស់អាស្រមកេរដូនតា ។
៩. បួនមិថុនាខួបមរណៈ
ខ្មែរគ្រប់ជាន់ថ្នាក់ពេញលោកា
មិនថាខ្មែរក្រោម ខ្មែរកណ្តាល
ឈឺចាប់ខ្លោចផ្សារដូចតែគ្នា។
១០.បួនមិថុនាចារខុសច្បាប់
ព្រមទាំងមិនស្តាប់កម្ពុជា
ឃុបឃិតត្រូវរ៉ូវតែគ្នាវា
បារាំងយួនជាជនមុខក្រាស់ ។
១១. បួនមិថុនាបារាំងដូរ
ជំនូនជាថ្នូរប្រវត្តិសាស្ត្រ
កាត់យកដីខ្មែរមិនអៀនខ្មាស់
ទៅដូរសម្រស់ក្រមុំយួន ។
១២. បួនមិថុនាសែប្រាំបួន
ខ្មែរក្រោមនឹមយួនចោរពាក់ដួន
គឺក្រោមនឹមដែកលើដីខ្លួន
ខ្មែរក្រោមស្រែកទួញយួនផ្តន្ទា។
១៣. បួនមិថុនាប្រហារខ្មែរ
ទូទាំងក្រុងស្រែកម្ពុជា
បំបែកកូនខ្មែរឲ្យឃ្លាតគ្នា
ខ័ណ្ឌចែកនាវារដ្ឋជាពីរ។
១៤. បួនមិថុនាខ្មែរត្រូវចាំ
ពេលខ្មែរប្រេះស្រាំមិនសាមគ្គី
ខ្មែរស្លាប់បាត់បង់អស់ជីវី
បាត់ពីផែនទីពិភពលោក ។
១៥. បួនមិថុនាបុណ្យមរណៈ
ខ្មែរគ្រប់ជាន់ថ្នាក់ថ្លែងវិយោគ
ទ្រូងខ្មែរអួលណែនឈាមកកគោក
ទឹកភ្នែកជាំជោកគ្រប់ទិសទី ។
១៦. បួនមិថុនាជាបណ្តាំ
ប្រវត្តិប្រេះស្រាំបែកសាមគ្គី
កូនខ្មែរបែកគ្នាបាត់ផែនទី
ដីមួយភាគពីរនៃកម្ពុជា ។
១៧. បួនមិថុនាព្យុះមរណៈ
ខ្មែរជាប់ច្រវ៉ាក់ខ្នោះយួនឆ្កែ
បាត់សិទ្ធសេរីទុក្ខឆ្នាំខែ
គឺបងប្អូនខ្មែរក្រោមម្ចាស់ដី។
១៨.ឲ្យយតែដល់បួនមិថុនា
ខ្មែរពេញលោកាទាំងប្រុសស្រី
ក្មេងចាស់ជំទង់យុវតី
នឹកខួបបាត់ដីយំរួមគ្នា ។

&&&&&&&&

ចាប់ផ្តើមនិពន្ធនៅភូមិស្វាយជួរ,ថ្ងៃទី២៥ ខែកក្កដា ឆ្នំា២០១១(ថ្ងៃប្រលងបាក់ឌុប)

និពន្ធបញ្ចប់នៅរាជធានីភ្នំពេញ,ថ្ងៃទី ០៤ ខែ មិថុនា ឆ្នំា២០១២

និងរៀបចំកែសម្រួលអក្ខរាវិរុទ្ធនិងពិនិត្រចុងចួនឡើងវិញនៅរាជធានីភ្នំពេញ,

ថ្ងៃទី ០៤ ខែ មិថុនា ឆ្នំា២០១៣

ខ្ញុំព្រះករុណាខ្ញុំបាទ៖ ផេង វិសុដ្ឋារ៉ាមុនី

និស្សិតនៃពុទ្ធិកសាកលវិទ្យាល័យព្រះសីហនុរាជ

និស្សិតសិក្ខាកាមវគ្គបណ្តុះបណ្តាលតែងនិពន្ធ ជំនាន់ទី២៩នៃសមាគមអ្នកនិពន្ធខ្មែរ

E-mail : visotharamuny@gmail.com

  Skype: pheng.visotharamuny

Facebook : Pheng visotharamuny.

ចប់ដោយបរិបូរណ៏