សិក្សាពីរបៀបនិពន្ធកំណាព្យខ្មែរទាំងអស់គ្នា
សល់អ្វី...? (បទ : ថយក្រោយ ឬថយក្រោយចូលព្រែក)
ខ្វិនខ្វាក់គរថ្លង់ ល្អជាជាង
បង់បាត់រូបរាង ពិតទៀងត្រង់
ត្រង់ទៀងពិតរាង រូបបាត់បង់
ជាងជាល្អថ្លង់ គរខ្វាក់ខ្វិន ។
កាប់គាស់កាយកិន ក្លិនផ្សាខ្លោច
ហីនហោចខ្ទេចអស់ ស្ទើរខ្លោចឆ្អិន
ឆ្អិនខ្លោចស្ទើរអស់ ខ្ទេចហោចហីន
ខ្លោចផ្សាក្លិនកិន កាយគាស់កាប់ ។
ព្រៃឈើអស់ឆាប់ កាប់កាត់ភ្នំ
ស្លាប់សត្វតូចធំ ដោយចងចាប់
ចាប់ចងដោយធំ តូចសត្វស្លាប់
ភ្នំកាត់កាប់ឆាប់ អស់ឈើព្រៃ ។
សព្វគ្រប់គេលៃ ច្នៃបាំងបិទ
គៃកេងតាមចិត្ត ឥតខ្វល់ភ័យ
ភ័យខ្វល់ឥតចិត្ត តាមកេងគៃ
បិទបាំងច្នៃលៃ គេគ្រប់សព្វ ។
អ្វីសល់ក្រោយចប់ កៅសិបឆ្នាំ
កប់ចិត្តគិតចាំ ដេកត្រាំសព
សពត្រាំដេកចាំ គិតចិត្តកប់
ឆ្នាំកៅសិបចប់ ក្រោយសល់អ្វី ?
និពន្ធដោយ លោក ប៊ុន ពិសី
No comments:
Post a Comment