« បណ្ឌិត គ្រប់តាមវិស័យ » ផេង វិសុដ្ឋារ៉ាមុនី

បណ្ឌិតនយោបាយ ផ្សងគ្រោះថ្នាក់
កាត់មុខច្រវ៉ាក់ អន្ទាក់សត្រូវ
ដើម្បីជាតិរស់ ដើរទៅត្រង់ផ្លូវ
កាត់មុខសត្រូវ ចាំទាក់បណ្ឌិត ។

បណ្ឌិតសាសនា លើកស្ទួយតម្កើង
ជ្រោងសីលធម៌ឡើង ឲ្យខ្ពស់ប្រណីត
អប់រំនិស្ស័យ ច្នៃកុលបុត្រពិត
នេះហើយបណ្ឌិត ផ្នែកខាងសាសនា ។
បណ្ឌិតវប្បធម៌ សាងគុណតម្លៃ
បោះពុម្ពស្នាដៃ ស្ទួយជាតិខេមរា
ស្នងកេរ្តិ៍មតក៌ ចូលរួមរក្សា
វប្បធម៌ដូនតា ឲ្យបានគង់វង្ស ។
បណ្ឌិតអក្សរសាស្រ្ត កែតម្រង់
ភាសាឲ្យត្រង់ ត្រូវច្បាប់យូលង់
បណ្តុះនិស្ស័យ តពូជពង្ស
អក្សររឿងរុង ត្រូវតាមលំអាន ។
បណ្ឌិតសង្គម ខាងប្រវត្តិសាស្រ្ត
ផ្សព្វផ្សាយខ្លាំងណាស់ ឲ្យជាតិដឹងដាន
រឿងរ៉ាវកន្លង ឆ្លងសតវត្សរ៍បាន
ឲ្យជាតិច្បាស់បាន មានស្មារតីជាតិ ។
បណ្ឌិតអប់រំ បណ្តុះបណ្តាល
ពង្រឹងខេមរា ឲ្យខ្ពង់ខ្ពស់ទៀត
មានវិជ្ជាមាំ សមត្ថភាពទៀត
ដើម្បីស្ទួយជាតិ កម្ពុជាយើង ។
បណ្ឌិតសេដ្ឋកិច្ច ខំទប់សង្គម
កុំឲ្យរលំ រលើងបះជើង
រិះរកវិធី ជួយសេដ្ឋកិច្ចយើង
មានលំនឹងឡើង ថ្កើងថ្កានជាតិយើង ។ ហិហិហិហិ
៧ រោច ខែ ភទ្របុទ្រ ២៥៦០ / ២៤ កក្កដា ២០១៦
ដោយ : ផេង វិសុដ្ឋារ៉ាមុនី