កំណាព្យ « អ្នកនិពន្ធពិត » ផេង វិសុដ្ឋារ៉ាមុនី

អ្នកនិពន្ធពិត
**********
អ្នកនិពន្ធពិត ចំណេះមួន
រស់នៅលាក់ខ្លួន ពួនបិទបាំង
និពន្ធការពិត ប៉ះពាល់ខ្លាំង
គេថាប្រឆាំង ត្រូវកម្ចាត់ ។

អ្នកនិពន្ធពិត គិតគុណធម៌
តែងស្ទួយវប្បធម៌ ខ្មែរសម្បត្តិ
មានមនសិការ ថ្លាម៉ឺងម៉ាត់
ខ្សត់ទ្រព្យសម្បត្តិ បោះពុម្ពផ្សាយ ។
អ្នកនិពន្ធពិត គិតគូណាស់
ដល់អក្សរសាស្រ្ត ខ្មែរទាំងឡាយ
សម្រិតសម្រាំង មុននឹងផ្សាយ
បោះពុម្ពចែកចាយ ផ្សាយវប្បធម៌ ។
ដោយ : លោក ផេង វិសុដ្ឋារ៉ាមុនី
១៣ រោច ខែ ភទ្របុត្រ ឆ្នាំវក អដ្ឋស័ក ព.ស. ២៥៦០
ថ្ងៃ សុក្រ ទី ៣០ ខែ កញ្ញា ឆ្នាំ ២០១៦ (12:48PM)

មែន ឬ មិនមែន ?
***************
អ្នកនិពន្ធពិត ឥតមានលុយ
អ្នកនិពន្ធស្លុយ លុយហូរហៀ
មានទាំងបុណសក្តិ តំណែងងារ
ខ្លឹមសារល្អជា គេមិនខ្វល់ ។

អ្នកនិពន្ធពិត មានគុណធម៌
ដើម្បីវប្បធម៌ ឡើងខ្ពស់ដល់
តែគ្មានទឹកប្រាក់ ទុកតម្កល់
បោះពុម្ពផ្សាយដល់ មហាជន ។
អ្នកនិពន្ធក្លែង ចេះសើ ៗ
ធ្វើឯងគ្រាន់បើ អ្នកនិពន្ធ
អាងមានទឹកប្រាក់ ជាទម្ងន់
ផ្សាយជូនដល់ជន ទាំងគ្មានខ្លឹម ។
ដោយ : ផេង វិសុដ្ឋារ៉ាមុនី