សូមថ្វាយព្រះពរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត។

សូមថ្វាយព្រះពរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត។

បពិត្រព្រះករុណាជា អម្ចាស់ជីវិតតម្កល់លើត្បូង ទីសក្ការៈដ៏ខ្ពង់ខ្ពស់បំផុត ស្ថិតក្នុងថ្ងៃនក្ខត្តឫក្សដ៏សែនមហាប្រសើរថ្លៃថ្លា នៃការយាងគ្រងព្រះបរមសិរីរាជ្យសម្បត្តិ គម្រប់ខួប១០ឆ្នាំរបស់ ព្រះករុណាព្រះបាទ សម្តេច ព្រះបរមនាថ ( ២៩.តុលា.២០០៤-២៩.តុលា.២០១៤ ) ទូលព្រះបង្គំ សូមបួងសួងនឹកដល់គុណព្រះរតនត្រៃ គុណកែវទាំងបី អស់វត្ថុសក្ដិសិទ្ធិក្នុងលោក បារមីព្រះអង្គចេក ព្រះអង្គចម បារមីថែរក្សាទឹកអង្គរដ៏រុងរឿងនៃកម្ពុជរដ្ឋនៃយើង ជាពិសេស ព្រះបារមីដួងព្រះវិញ្ញាណក្ខន្ធ ព្រះមហាវីរៈក្សត្រ សម្ដេចឪ សម្ដេចតា សម្ដេចតាទួត ព្រះបរមរតនៈកោដ្ឋ ជាទីសក្ការៈដ៏ខ្ពង់ខ្ពស់បំផុត។ សូមព្រះអង្គឃាងចុះមកជួយអភិបាលឃុំគ្រង ប្រោសប្រទានព្រះពរជ័យ សិរីមហាប្រសើរថ្វាយ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។ សូមព្រះអង្គ មានព្រះជន្មាយឺនយូរ ព្រះកាយពល និងកម្លាំងមាំមួន ព្រះសុខភាពល្អបរិបូរណ៌ ពោរពេញទៅដោយឫទ្ធីតេជៈបារមី សិរីសួស្ដី និងសុភមង្គលគ្រប់ពេលវេលា ដើម្បីរាជានិយម និងជាម្លប់ដ៏ត្រជាក់ត្រជុំសុខដុមរមនា របស់ប្រជារាស្ត្រខ្មែរ និងដើម្បីរួមចំណែកកសាងជាតិ បម្រើជាតិឱ្យរីកចម្រើនជាដរាបតរៀងទៅ។
ជាទីអវសាន សូមព្រះករុណាជា អម្ចាស់ជីវិតតម្កល់លើត្បូង ទីសក្ការៈដ៏ខ្ពង់ខ្ពស់បំផុត បានយាងជួបនូវព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

សូមក្រាបបង្គំទូលថ្វាយ ព្រះករុណាជា អម្ចាស់ជីវិតតម្កល់លើត្បូង ទីសក្ការៈដ៏ខ្ពង់ខ្ពស់បំផុត សូមព្រះអង្គ ព្រះមេត្តាប្រោស ទទួលនូវអភិវន្ទនកិច្ច និងកតញ្ញូតាធម៌ដ៏ជ្រាលជ្រៅបំផុតអំពីទូលព្រះបង្គំ។

សេចក្ដីគួរពុំគួរ សូមព្រះករុណាជា អម្ចាស់ជីវិតតម្កល់លើត្បូង ទីសក្ការៈដ៏ខ្ពង់ខ្ពស់បំផុត សូមព្រះមេត្តាប្រោស និងព្រះរាជទានទោស៕

រាជធានីភ្នំពេញ ថ្ងៃទី២៣ ខែតុលា ឆ្នាំ ២០១៤
ដោយក្តីគោរពសក្ការៈអំពីទូលព្រះបង្គំ