នេះហើយឬស្រុកខ្មែរសព្វថ្ងៃ ?
-----------------------------------
១. លុយឡានវីឡា កិត្តិយសមាសប្រាក់
អំណាចបុណ្យសក្តិកូនខ្មែរចង់បាន
កាមគុណ តណ្ហា ចរិតប្រុសប្រាណ
ភ្លេចអ្វីភ្លេចបាន មិនភ្លេចអាហ្នឹង ។
២. នេះឬស្រុកខ្មែរ ប្រទុស្តរាល់ថ្ងៃ
អ្នកមានបានដៃ រំលោភសិទ្ធប្តឹង
អ្នកក្ររងទុក្ខ មុខអង្គុយខឹង
សញ្ជប់សញ្ជឹង តូចចិត្តវាសនា ។
៣. តម្លៃមនុស្ស បាត់បងអស់ហើយ
មិនរង្វល់ឡើយ គុណធម៌ថ្លៃថ្លា
នេះហើយឬស្រុកខ្មែរថ្កើងអស្ចារ្យ
អោយតម្លៃស្រា បុណ្យសក្តិអំណាច ។
៤. ស្មារតីជាតិនិយម ខ្មែរខ្លាចស្លាប់
ខ្លាចគេចងចាប់ ខ្លាចច្បាប់គេកាច
អំណួតខុសក្បួនយួនចូលប្រសាច
នេះហៅពេញឆ្លាត កូនខ្មែរសព្វថ្ងៃ។
៥. បណ្ឌិត លក់ខ្លួនពួនលាក់ចំណេះ
អ្នកល្ងង់ធ្វើចេះ វាឡើងបានដៃ
ខ្មែរចាកចោលស្រុក ស៊ីឈ្នួលស្រុកថៃ
កូរ៉េ ចិន តៃវ៉ាន់ មាឡេស៊ី ។
៦. និស្សិតរៀនចប់ ត្រឡប់ទាត់ខ្យល់
អ្នកធំមិនខ្វល់ អ្នកមានពានឈ្លី
អយុត្តិធម៌ សង្គមគ្រប់ទិសទី
អួតស្រុកគ្មានពីរ ល្អគ្មានគេដូច ។
===========================
រាជធានីភ្នំពេញ ០៥ មករា ២០១៤
និពន្ធដោយ៖ ផេង សុខវ៉ាន់ដា
No comments:
Post a Comment