កំណាព្យ « សម្រស់ប្រាង្គប្រាសាទបន្ទាយស្រី »

កំណាព្យ « សម្រស់ប្រាង្គប្រាសាទបន្ទាយស្រី »
================================
សរសេរនៅក្នុងប្រាសាទបន្ទាយស្រីព្រឹកថ្ងៃ អាទិត្រ ទី ២៨ 
ខែ កុម្ភៈ ឆ្នាំ ២០១៦ អនុស្សាវរីយ៍ក្នុងដំណើរទស្សនកិច្ចសិក្សាបញ្ចប់បរិញ្ញាប័ត្រឆ្នាំទី ៤ ដឹកនាំដោយ ព្រះឧបាលីវង្ស បណ្ឌិត យ៉ន សេងយៀត ព្រះសាកលវិទ្យាធិការ រង នៃពុទ្ធិកសាកលវិទ្យាល័យព្រះសីហនុរាជ និងព្រះចរណៈវិជ្ជា 
ចេម ធីរៈ ព្រះប្រធានការិយាល័យរដ្ឋបាល &ហិរញ្ញវត្ថុនៃពុទ្ធិកសាកលវិទ្យាល័យព្រះសីហនុរាជ
និពន្ធដោយ លោក ផេង វិសុដ្ឋារ៉ាមុនី 
( នាមដើម ផេង សុខវ៉ាន់ដា ) 
និស្សិត ពុទ្ធិកមហាវិទ្យាល័យទស្សនៈវិជ្ជានិងសាសនា 
ឯកទេសៈ សង្គមវិទ្យា នៃព.ស.ស ទីតាំងគោល ភ្នំពេញ

រចនាក្បាច់ចម្លាក់បន្ទាយស្រី
ឆើតផុតលោកិយ ល្អល្អះអស្ចារ្យ
មិននឹកស្មានសោះស្នាដៃដូនតា
បុព្វខេមរា ល្អហួសការស្មាន ។

♡ ធ្លាប់តែបានលឺ ល្បីល្បាញតគ្នា
វិចិត្រសោភា ស្នាដៃចំណាន
ធ្លាប់តែដឹងស្ងប់ស្ងែងតាមការអាន
អ្នកនិពន្ធបាន តែងសរសើរលើក។

♡ ឥលូវបានឃើញ ផ្ទាល់ច្បាស់នឹងភ្នែក
ចម្លាក់ល្អឯក ស្រស់រស់រវើក
គ្រាន់តែបានឃើញ ស្មារតីភ្លេចភ្លឹក
អារម្មណ៍គួចនឹក ស្រណោះម្លេះណា ។

♡ ខ្ញុំសែនស្ងប់ស្ងែង រំភើបបេះដូង
ជាលើកដំបូង ឃើញប្រាង្គដូនតា
ព្រោះតែស្នាដៃ វិសេសអស្ចារ្យ
មតក៌ខេមរា សម្បត្តិលោកិយ ។

♡ បរិវេណផ្ទៃដី ដ៏ធំល្វើយល្វឹង
គូទឹកសន្ធឹង ព័ទ្ធជុំដោយព្រៃ
សមរដូវប្រាំង សម្លេងសត្វរៃ
គឹកកងរំពៃ ស្វាគមន៍ទេសចរណ៍ ។

♡ បើបានឃើញហើយ ច្បាស់ជាជាប់ចិត្ត
ទុក្ខព្រួយខ្វល់ចិត្ត ប្រែជាស្រស់ល្អ
គួចនាំស្មារតី យើងឲ្យបន្ត
ថែរក្សាតំណ ក្នុងស្មារតីជាតិ ។

♡ កណ្តាលទ្រូងព្រៃ ស្រណោះម្លេះទេ
ស្នាដៃបុព្វេ ប្រឹងប្រែងឆ្លាក់ឆ្លៀត
ជាចំណងដៃ ខ្មែរសន្តានញាតិ
សម្បត្តិមនុស្សជាតិ ក្នុងលោកា ។