តារាស្រុកខ្មែរ

| តារាស្រុកខ្មែរ | បទកាកគតិ

ក្រុមពួកតារា      សំញែងហ៊ឺហា       ឬកដូចសេដ្ឋី
ខោអាវសុទ្ធថ្លៃ   តម្លៃណា៎ណី          ឡានទំនើបថ្មី 
ថ្លៃហួសកប់ក្តោង ។

អួតសម្ភារៈ        ហ៊ឺហាគ្រឹកគ្រាក់      សំដីរាងកោង
អួតប្រជែងគ្នា    កុំឲ្យគេតោង           ខ្លួនខំបំប៉ោង 
បង្អួតឡានថ្មី ។

ដល់តែពេលឈឺ   ខ្លួនមានជម្ងឺ         ចាប់ផ្តើមសំដី
ប្រកាសសុំទាន    បងប្អូនប្រុសស្រី   សូមអាណិតក្តី 
នាមខ្មែរជួយខ្មែរ ។

ខ្ញុំឃើញតែញឹក     មានច្រើនសន្ធឹក   តារាហូរហែ
ពេលមាន ហ៊ឺហា   ឬកដូចថៅកែ       ដល់ឈឺសុំខ្មែរ 
អាណិតសង្រ្គោះ ។

ថ្ងៃ ពុធ ០៧ រោច ខែ មាឃ ឆ្នាំរការ នព្វស័ក ពុទ្ធសករាជ ២៥៦១ ត្រូវនិងថ្ងៃទី ០៧ ខែ កុម្ភៈ គ្រិស្តសករាជ ២០១៨
និពន្ធដោយ : លោក ផេង វិសុដ្ឋារ៉ាមុនី