កំណាព្យ « ខ្ញុំចង់បាន »

កំណាព្យ « ខ្ញុំចង់បាន »
----------------------------------
ខ្ញុំចង់បាន វប្បធម៌ចែកគ្នារស់
វប្បធម៌សាបព្រោះ តែអំពើល្អ
វប្បធម៌ចែករំលែក ដ៏បវរ
ដោយចិត្តស្មោះស ឆន្ទះពិត ។

ខ្ញុំចង់បាន វប្បធម៌សន្តិភាព
គឺល្អពេញប្រៀប កាយ វាចា ចិត្ត
គ្មានហិង្សានយោបាយ ឧក្រិដ្ឋ
ហិង្សាផ្លូវចិត្ត កាយ វាចា ។
ខ្ញុំចង់បាន វប្បធម៌កិច្ចសន្ទនា
ដោយស្មើភាពគ្នា ដ៏ល្អអស្ចារ្យ
សាមគ្គី ឯកភាព ដោយកិច្ចចរចារ
គ្រប់និន្នាការ ខ្មែរចេះស្តាប់គ្នា ។
ខ្ញុំចង់បាន វប្បធម៌នៃការអាន
ខ្មែរគ្រប់សន្តាន ស្វែងរកវិជ្ជា
ស្រាវជ្រាវ រាវរក អានគ្រប់ៗគ្នា
ទើបកម្ពុជា អភិវឌ្ឍន៍បានលឿន ។
------------------------------------------
ថ្ងៃ ០៧ រោច ខែ មិគសិរ ឆ្នំា មមែ ព.ស. ២៥៥៩
ត្រូវនិងថ្ងៃ ព្រហ ទី ០៧ ខែ មករា ឆ្នំា ២០១៦
និពន្ធដោយ « ផេង វិសុដ្ឋារ៉ាមុនី »
ពុទ្ធិក សាកលវិទ្យាល័យ ព្រះសីហនុរាជ រាជធានីភ្នំពេញ