ចាំតែអូន ! ដោយ : សូ៑ ខេមរិន្ទ

......ចាំតែអូន !
ដោយ : សូ៑ ខេមរិន្ទ
★ បើអានពីលើចុះក្រោម រាល់ពាក្យនៅដើមឃ្លានីមួយៗ
នឹងឃើញ កំណាព្យបទពាក្យ៧មួយទៀត...
រចនាបថ : នាងពួន

ខ្យល់ ផាត់ថ្នាក់ថ្នម អមដួងខែ
នៅ ចងចាំតែ រូបអូនមួយ
តែ ចិត្តក្រំក្រៀម បៀមទុក្ខព្រួយ
បក់ បោករញ្ជួយ រោយសោកសៅ ។
គ្មាន ពេលភ្លេចបាន ប្រាណត្រាណត្រើយ
ប្រែ ព្រាត់ឆ្ងាយហើយ ក៏ចាំនៅ
គេច នឹកជួបនឹក រលឹកពៅ
ចិត្ត ស្នេហ៍ឆោមឆ្លៅ ត្រូវរីងរៃ ។
ខំ រៀនក៏ព្រោះ តែនួនល្អង
បំ ពេញបំណង ជូនចរណៃ
ភ្លេច ទុក្ខសោកអស់ ជួបស្រស់ស្រី
នៅ រស់ឥតន័យ គ្មានស្រីកើយ ។
តែ បងដឹងច្បាស់ អូនស្ម័គ្រគេ
ចាំ ចងផ្សងស្នេហ៍ គេស្រាប់ហើយ
ភ្នែក ស្រស់កល្យាណ គ្មានបងឡើយ
ទួញ យំឥតស្បើយ ខ្នើយរងទុក្ខ ។
ទឹក ហូរជ្រែកចិត្ត ដិតកង្វល់
ស្រក់ ជោកផែនថ្ពាល់ ស្គាល់ត្រឹមមុខ
ដក់ ទ្រូងចំបែង លែងស្គាល់សុខ
ថ្ពាល់ បងចងទុក ស្នាមទឹកភ្នែក ។
ស្ដាំ ស្ម័គ្រឆ្វេងស្នេហ៍ តែអូនមួយ
រយ ពាន់ជាន់ព្រួយ នឹកអូនពេក
ថ្ងៃ យប់ខកប្រាណ ខានបានដេក
ខែ រះលើមេឃ ស្រែកឆ្ងាយដី។
ឆ្នាំ ចាស់ឆ្លងផុត រលត់សូន្យ
ចាំ ចងឈ្មោះអូន គ្រប់រាត្រី
តែ ចិត្តស្រលាញ់ ចាញ់អស់ន័យ
អូន ស្រីលែងខ្វល់ ដល់បងហើយ....... ។
សូ៑ ខេមរិន្ទ
២២ តុលា ២០០៦
កែសម្រួល ១៤ មករា ២០១៤