" វាចាម្ចាស់ស្ទឹង កវីម្ចាស់ស្ទឹងសង្កែ គង្គ ប៊ុនឈឿន "

" វាចាម្ចាស់ស្ទឹង កវីម្ចាស់ស្ទឹងសង្កែ គង្គ ប៊ុនឈឿន  "
ដងស្ទឹងសង្កែ ខែលិចផុតទៅ
រំដួលអូននៅ រង់ចាំរៀមរ៉ា
បងអារឈាមស្រក់ លើផ្ទៃជលសា
 រត់រកជីវ៉ា លើស្ពានអភ័ព្វ ។

- ដើមដូងទីដប់ ម្លប់គ្របមាត់ស្ទឹង
បងចាំព្រលឹង ដោយចិត្តញ័រញាប់
សែនស្តាយថ្ពាល់ស្តាំ រង់ចាំគូគាប់
រាហូអភ័ព្វ លាគ្មានវិលវិញ ។

 - លាសូម៉ាត្រា សង្សារកំសត់
លាពាក្យសម្បថ ទាំងទុក្ខទោម្នេញ
តោឈរយាមផ្លូវ បងនៅទន្ទេញ
យកសំបុត្រចេញ ទ្រាប់ខ្នងរៀមរ៉ា ។

- លោកស្លាប់ស្រុកគេ តែចិត្តចងចាំ
ផ្ញើជាបណ្តាំ ដល់អស់ខេមរា
ស្រឡាញ់ជាតិសាសន៍ ហើយនិងរដ្ឋា
ខំពួតដៃគ្នា រក្សាវប្បធម៌ ។

- សិល្ប:ខ្មែរមាន កុំរៀនពីគេ
ខំធ្វើខំថែ លោកសូមអង្វរ
កុំចម្លងគេ មិនមែនរឿងល្អ
ខ្មែរធ្លាប់បវរ ស្នាដៃថ្កើងថ្កាន ។

 - លោកបិទភ្នែកទៅ ចិត្តនៅតែនឹក
ហៅសែនរលឹក នឹកដល់ភូមិឋាន
ធ្លាប់រស់ជួបជុំ ទ្រនុំសុខសាន្ត
 លាញាតិសន្តាន លារៀងរហូត ៕
ភ្នំពេញ ថ្ងៃទី21 ខែមេសា ឆ្នាំ2016
ពី Khmer Sub Videos & EVT
 គោរពជូន ដួងវិញ្ញាណក្ខន្ធលោក គង្គ ប៊ុនឈឿន 
កវីម្ចាស់ស្ទឹងសង្កែដ៏ល្បីល្បាញ ដែលបានទទួលមរណ:ភាព
កាលពីថ្ងៃទី ១៧ ខែមេសា ឆ្នាំ ២០១៦ ក្នុងជន្មាយុ ៧៨ ឆ្នាំ 
ដោយជរាពាធ សូមវិញ្ញានក្ខន្ធលោក 
បានទៅដល់សុគតិភព កុំបីឃ្លៀងឃ្លាតឡើយ ។