ទឹកភ្នែកប្រវត្តិសាស្រ្តជាតិ

ទឹកភ្នែកប្រវត្តិសាស្រ្តជាតិ
..........................................
១. ប្រវត្តិសាស្រ្តទួញយំ រាប់សតវត្សរ៍
ព្រោះខ្មែរប្រាស់ព្រាត់បែកបាក់សាមគ្គី
សត្រូវមើលងាយពីគ្រប់ទិសទី
រំលោភពានឈ្លី ញីខ្មែរនិងជើង ។
២. មរតក៌ដូនតា ប្រាសាទរយពាន់
សាកលស្ងើចលាន់ សរសើរខ្មែរយើង
ចរិតស្លូតត្រង់ មិនឡើយទំនើង
ពូជសាសន៍ឈាមយើង អំបូរធ្លាប់ថ្កើង។
៣. ជាច្រើនសតវត្សរ៍ ខ្មែរធ្លាប់រុងរឿង
ខ្មែរក្លាហានសឿង វប្បធម៌ឈានឡើង
អំណាចចក្រភព សាសន៍គេតម្កើង
គ្រប់វិស័យឡើងខ្ពស់ព្រោះក្សត្រា ។
៤. ចាប់ពីត្រឹមសតវត្សរ៍ទីដប់បី
ខ្មែរធ្លាក់រាសី រងទុក្ខខ្លោចផ្សា
ជួបតែសង្គ្រាម បែកបាក់ខេមរា
វិះបាត់រដ្ឋា ពីភពផែនដី ។
៥. អង្គរទួញយំ ខ្មំាងសៀមវាលុក
មកចតុមុខ បែកបាក់ជាបី
សម័យលង្វែក សៀមលុកជាថ្មី
ច្បាប់ក្បួនប្រាជ្ញថី សៀមប្រមូលអស់។
៦. ពេញមួយសម័យឧដ្តុង នោះណ៎ា
ខ្មែរទុក្ខអស្ចារ្យ គួរឲស្រណោះ
វិះបាត់ទឹកដី មរតក៌កេរកោះ
ពូជសាសន៍សូន្យអស់ៗឈ្មោះជាខ្មែរ។
រាជធានីភ្នំពេញ ២៥ វិច្ឆិកា ២០១៤
និពន្ធដោយ៖ ផេង សុខវ៉ាន់ដា