កំណាព្យស្នេហ៍

ស្រីស្រស់ថ្ពាល់ខួចរៀមគួចចងស្នេហ៍ 
វង់ភ័ក្រដូចខែ រៀមញ៉ែមិនធុញ 
ម្រាមដៃតូចស្រស់សម្រស់មានមន្ត 
រៀមបងគយគន់មិនឆ្អែតទេថ្លៃ........... 
 ថ្ពាល់ខួចស្រស់ខ្ចីទើបពេញក្រពុំ 
ក្លិនប្រហើរងុំ ក្រពុំពេជ្រច្នៃ 
រៀមសុំស្រង់ក្លិនថ្ពាល់ស្រស់ចរណៃ 
និស្ស័យរៀមភ្ជាប់សូមរួមជីវិត........ 
បើស្រីព្រមស្ម័គ្រ រៀមសូមសន្យា 
នឹងថ្នមរក្សា តែកែវវរមិត្ត 
ប្រាក់ខែបើកបាន ដល់ដៃពៅពិត 
ស្មោះមួយជីវិត តែកន្និដ្ឋា.................. 
ដោយ ៖ « ផេង វិសុដ្ឋារ៉ាមុនី រាជភក្ដី »
================================

បបេរមាត់ក្រហមដូចសេក 
គន់ទៅកែវភ្នែកក្រឡង់ៗ \
ថ្ពាល់ពេញក្រពុំស្រស់ផូរផង់
 គល់ ក ស ខ្ញង់រលោងស្រិល ។
 រៀមគន់មួយភ្លែតត្រេកត្រអាល
 ឆេះឆាបកាមា ចង់រួមប្រាណ
 ដុតរោលកំសួលញ័រអង្គប្រាណ 
ចង់បានកល្យាណប្រលោមស្នេហ៍.....
====================================
 ខ្ញុំជាកូនពៅ នៅកម្លោះ 
ដួងចិត្តសស្មោះ បេះដូងខ្មែរ 
កូនអ្នកចម្ការទន្លេស្រែ 
តែចិត្តខ្ញុំស្នេហ៍ ខ្មែររួមជាតិ ...... 
ទ្វារបេះដូងខ្ញុំបិទរឿងស្នេហ៍ 
សោរនៅលើម៉ែ កាន់មិនឃ្លាត 
ស្រីណាស្នេហ៍ខ្ញុំ ត្រូវស្នេហ៍ជាតិ 
ស្រលាញ់ខ្មែរញាតិ ទើបខ្ញុំព្រម. ........ 
ផេង វិសុដ្ឋារ៉ាមុនី
==========================
 
ស្អាតៗម្លឹងៗរៀមទ្រាំម្តេចបាន 
ស្នើចិត្តកល្យាណមានគូឬនៅ 
បើនៅទំនេរ រៀមឲ្យម៉ែឪ 
ចូលដណ្តឹងពៅ ជាគូមេត្រី 
ទោះថ្លៃបណ្ណាការបង្គាប់ប៉ុន្មាន
 ឬបំរើប្រាណពុកម្តាយស្រស់ស្រី 
ក៏រៀមព្រមដែរណា៎កែវពិសី 
ដើម្បីរូបស្រីរៀមព្រមទាំងអស់......
===========================
 
ខ្ញុំស្រលាញ់តែនារីសិល្បៈ 
យីកេ,បាសាក់,របាំ,អាយ៉ៃ
 សម្តែងភាពយន្ត ខ្ញុំមាននិស្ស័យ
 ស្រីស្រស់ចរណៃនិស្ស័យដូចខ្ញុំ ។
 ជានារីខ្មែរថែកេរ្តិ៍ខេមរា 
សមត្ថភាពថ្លៃថ្លាសិល្បៈ,ប្រវត្តិសាស្ត្រ 
មានចំណេះដឹងវប្បធម៌ខ្មែរច្បាស់ 
ខ្ញុំស្រលាញ់ណាស់ ស្រីខ្មែរនិស្ស័យហ្នឹង ។
=================================